فنادق ما بتلاقيها إلا بالشام 

دمشق القديمة، بجمالها وأصالتها، بتقدم تجربة سياحية فريدة من نوعها لكل اللي بيزورها. من بين التجارب اللي ما بتتفوت هي الإقامة بأحد الـ فنادق بالشام اللي بتحمل روح التراث الدمشقي. هون، رح نتعرف على مجموعة من الأوتيلات اللي ما بتلاقي مثلها إلا بالشام القديمة، وكل واحد منها بيجمع بين الخدمة المودرن والروح الأصيلة 

فندق بيت زعفران:

بيت زعفران موجود بباب توما بقلب دمشق القديمة. هالفندق كان بيت قديم انبنى بالـ1836، ورجعوا رمموه ليصير فندق فاخر. بيتميز بيت زعفران بديكوره الشامي التقليدي، وعنده 12 غرفة وجناحين، كلهم بيطلوا على باحات داخلية فيها نوافير ومزروعات بتخلي الجو هادي ومريح.

فندق تلميسان:

بحي الأمين بقلب دمشق القديمة، موجود فندق “تلسمان”. هالفندق كان بالأصل بيت دمشقي قديم، تقريباً أشبه بقصر، ومساحته كبيرة حوالي 3000 متر مربع. اللي بيميزه إنه تم ترميمه والمحافظة على طابعه الأثري من دون تغيير تفاصيله اللي عمرها حوالي 350 سنة. حتى في خبير آثار اكتشف قوسين قديمين بالعمر يزيد عمرهم عن ألفين سنة ضمن تصميم البيت.

الفندق كمان مميز بأثاثه القديم؛ الأسِرة عمرها أكتر من 80 سنة، وفيه طاولات وخزانات قديمة بيوصل عمرها لأكتر من 100 سنة. واحدة من البحرات بالفندق تم تحويلها لمسبح لأن كتير من الزوار بيحبوا السباحة.

اللون الأحمر اللي بيميل للون دم الغزال بيزين حيطان الفندق الداخلية، وهاد الشي كان بقصد التميز عن باقي البيوت الدمشقية. اسم الفندق “تلسمان” يعني “جلب الحظ”، ولهيك اختاروا شعار الكف الأزرق المعروف بجلب الحظ وإبعاد العيون الحاسدة.
الوصول للفندق ممكن يكون شوي معقد بسبب الأزقة الضيقة بحي الأمين، بس إدارة الفندق جهزت خرائط وكتبت دليل للسياح لسهولة الوصول، وحتى وفروا سيارات كهربائية صغيرة لتوصيل الزوار من الأزقة الضيقة للمكان​.

فندق بيك باش:

موجود بدمشق القديمة بوج الكنيسة المريمية، وبيجمع بين الطابع الشامي التقليدي والحداثة. موقعه كتير مميز بقلب المدينة قريب على كل شي والفندق بيقدم خدمات ممتازة لضيوفه، وبيعتبر خيار مميز للي بدهم يقيموا بمكان بيجمع بين الراحة والأصالة