بالشامي
35 من أحلى الأمثال: شو قالو الشوام عن كانون؟
كانون… شهر البرد القارس و المطر اللي بيغسل الأرض. كانون يعني الشتوية و الدفا و الذكريات . وآخر عشرة أيام من كانون الأول وكل كانون التاني، منسميهم اربعينية الشتاء او المربعانية، بيجي البرد بأقوى حالاته وبيبقى حوالي 40 يوم. أيام كانون مو بس برد ومطر، هي أيام فيها حكمة وتجارب عاشوها أجدادنا، ونقلوها إلنا على شكل أمثال شعبية، كل مثل بيحمل قصة أو نصيحة عن كيف نتعامل مع قسوة الشتا. تعالوا نسمع شو بيحكي لنا كانون بـ الأمثال يلي قالوها الشوام عنّو!
البرد و الصبر
1. “بكانون التاني بشو الله بلاني”
المثل بيعبر عن تعب الناس من المطر والبرد اللي ما بيخلص.
2. “بكانون حضر الفحم وعمر الكانون”
دعوة للاستعداد للبرد قبل ما يجي بقوته.
3. “بكانون الأجرد تقل أواعيك لتبرد”
لأن كانون بيجرد الشجر من الورق والناس بتحتاج اللبس الثقيل لتدفى.
4. “بعد كانون الشتي بيهون”
إشارة لأن بعد كانون، الشتوية بتخف.
5. “شمس كانون متل الطاعون”
لا تغتر بشمس كانون، لأنها خادعة.
6. “كانون، الصحو فيه ظنون”
الجو بكانون ما بينوثق فيه، ممكن ينقلب بأي لحظة.
7. “الصيت لكانون والفعل لشباط”
رغم شهرة كانون، شباط هو اللي بيحمل المفاجآت.
البرد القارس والمغامرات المجنونة
8. “بكانون الأصم اقعد ببيتك وانطم”
البرد القارس بيجبرك تضل بالبيت.
9. “كانون 2 كانون الأصم، بينزل من العيون دم”
وصف لشدة البرد اللي بيأثر حتى على العيون.
10. “كانون الأصم برده بيخرق العظم”
البرد الشديد ما كان يرحم.
11. “بكانون كن ببيتك يا مجنون”
الطقس السيئ بيخلي البقاء بالبيت هو الخيار الأنسب.
12. “بكانون وين رايح يا مجنون”
حتى الخروج بلا ضرورة كان يُعتبر تصرف مجنون.
العواصف والعتمة في كانون
13. “غيمة كانون بتخوف المجنون”
الغيوم السوداء دليل على أمطار وعواصف قوية.
14. “عتمة كانون بتخوف المجنون”
العتمة الطويلة كانت تزرع الخوف بقلوب الناس.
15. “برية المجانين بكوانين”
السفر في كانون كان يُعتبر تصرف غير منطقي.
16. “عرس المجانين بكوانين”
إقامة الأعراس بهالشهر ما كانت فكرة جيدة بسبب الطقس.
17. “طينة المجانين بكوانين”
البناء أو الطين بهالشهر كان يُعتبر جنون بسبب الأمطار.
الاستعداد والعمل الجاد
18. “بين كانونين سافر يا شقي وضيع المال مع المكسب”
السفر بهالوقت كان خطر وما فيه فائدة.
19. “بكانون كن ببيتك، وللطلعة ما تضل تحن وتعن”
نصيحة لتجنب الطلعات غير الضرورية.
20. “بكانون كن ببيتك عا دبسك وزيتك”
المؤونة هي سر الدفى والراحة بهالشهر.
21. “بكانون كن وعالفقير حن”
دعوة لمساعدة المحتاجين بهالشهر الصعب.
22. “مية كانون بتشفي كل معلول”
المطر بهالشهر كان يعتبر شفاء للأرض والناس.
الحكمة من الشتوية والطبيعة
23. “ما بتكن بالبير غير مية كوانين”
أمطار كانون هي اللي بتعبّي الآبار.
24. “أبرد من مية كانون”
وصف لشدة البرد القارس.
25. “لا تغرّك صحوة كانون ولا غيمة شباط”
الطقس بهالشهور متقلب وما بينوثق فيه.
26. “ما في أنقى من قمرة تشرين ولا أظلم من عتمة كانون”
مقارنة بين صفاء تشرين وعتمة كانون.
27. “نصبة كانون الأول بتسبق نصبة عمنول”
النباتات اللي تنزرع بكانون بتكون أفضل.
الأرض والخير في كانون
28. “كل الشجر بيتعرى بكانون إلا السنديان والصنوبر والزيتون”
الأشجار الصامدة دليل على القوة والتحمل.
29. “كانون الأجرد بيخلي الشجر أمرد”
الشجر بكانون بيكون عاري من الأوراق.
30. “اللي ما بيحرث بأجرد عند الصليبية بيجرد”
عدم الزراعة بكانون بيندم عليه المزارع.
31. “سيل الزيتون من سيل كانون”
خير الزيتون مرتبط بمطر كانون.
32. “الرعنة والمجنونة بتفتح بكانونة”
الأزهار اللي بتفتح بهالشهر تخالف الطبيعة.
33. “كانون فحل الشتاء”
المطر فيه هو الأهم لري الأرض.
34. “شتوة كانون ذخر، وشتوة شباط محل، وشتوة آذار خير، وشتوة نيسان بركة، وشتوة أيار هدية”
مقارنة بين فوائد الأمطار بالشهور المختلفة.
35. “إذا بأجرد ما روينا، محّلنا وما درينا”
مطر كانون هو الأمل لكل الأراضي.
ختاماً: كانون بين البرد والحكمة
كانون هو شهر البرد والعتمة، لكنه كمان شهر الخير والدفى. الأمثال الشعبية اللي قالوها الشوام عن كانون بتذكرنا دايماً بالحكمة والصبر، وكيف كانوا أجدادنا يلاقوا الدفى بالمؤونة ولمّة الأحباب. ومع كل برد كانون، بيضل الدفى الحقيقي بقلوب الناس.
مصدر الصورة: الجزيرة
إذا انبسطت بهالمقال عن الأمثال الشعبية اللي قالوها الشوام عن كانون ؟ تأكد تزور قسم #بالشامي على موقعنا لتشوف المزيد!