شو فيك تعمل بالشام القديمة بنهار؟

إذا عندك نهار عطلة ما عرفان شو تعمل فيه، أو إذا كنت سايح جاي زيارة عالشام فتذكر تضيف الشام القديمة على مخططاتك، معالم أثرية وأسواق ومتاحف ومطاعم وكل شي فيك تعمله بيوم واحد بهالمنطقة القريبة من وسط المدينة.

الجامع الأموي

الجامع الأموي هو واحد من أقدم وأهم المساجد بالعالم الإسلامي. مبني على أنقاض معبد روماني قديم، وهندسته المعمارية مميزة بزخارفها الفسيفسائية الجميلة والقباب الرائعة.

فيك تتمشى بالساحة الكبيرة، تشوف الضريح اللي بيقال إنه بضم رأس النبي يحيى (يوحنا المعمدان)، وتتأمل الزخارف المعمارية وتشوف جرن المعمودية كمان.

سوق الحميدية

سوق الحميدية هو أشهر أسواق دمشق القديمة، مليان محلات بتبيع كل شي من التوابل والعطور للألبسة والحلويات.

 تمشّى بين المحلات،، واشتري هدايا تذكارية مميزة ولا تنسى تاكل بوظة دق عند بكداش.

سوق القيمرية

سوق تقليدي بشوارع ضيقة مليان محلات بتبيع الحرف اليدوية، الملابس، والأطعمة، تمشّى بين المحلات، شوف الحرف اليدوية الجميلة، وجرب الأكلات عند بياع الكروسان والبطاطا وليمون جامد من محل صغير بالشارع.

الحارات القديمة (متل باب توما وباب شرقي)

 الحارات القديمة مليانة بيوت تقليدية شوارع ضيقة بجدرانها الحجرية، جوها تراثي وهادئ الشارع المستقيم بباب شرقي مثلا من المعالم الرومانية الموجودة لهلأ بدمشق مننصحك تتمشّى هنيك، تشوف البيوت القديمة، والكنائس الصغيرة المنتشرة بالمنطقة.

قلعة دمشق

 القلعة مبنية من القرن الحادي عشر الميلادي، وتعتبر واحدة من أهم القلاع بالمنطقة.فيك تتجول جوا القلعة، وتشوف الأبراج والحيطان القديمة.

مقهى النوفرة

مقهى قديم جنب الجامع الأموي، معروف بجوه التراثي والحكواتي اللي بيحكي قصص تاريخية. فيك تقعد، تاخدلك قهوة سادة أو كاسة شاي، واذا أنت محظوظ بيكون الحكواتي موجود

البيوت الدمشقية القديمة ( مطاعم وفنادق)

 بيوت تقليدية بأرض ديار، بتمثل العمارة الدمشقية القديمة. فيك تزور البيوت، شوف الديكورات الداخلية والزخارف الجميلة، وتستمتع بالغدا الشامي متل المشاوي، المازة، والكبة حوالين البحرة.

كنيسة القديس حنانيا والكنيسة المريمية

 كنائس قديمة بترجع للعصور المسيحية المبكرة، بتمثل التعايش الديني بالشام. بزيارتك لهالكنائس، بتتعرف على الأيقونات والرسومات الجدارية والموجودة فيها ويلي بتعطي سكينة وهدوء.

باب شرقي

 واحد من أبواب المدينة القديمة، بيضم محلات ومقاهي قديمة، نصيحة تنزل المسا و تتمشّى بالمنطقة، شوف المحلات هنيك لانو السهرة ولعانة بهي المنطقة.

ضريح صلاح الدين

ضريح صلاح الدين الأيوبي موجود بجانب الجامع الأموي. صلاح الدين هو القائد اللي حرر القدس من الصليبيين.

زور الضريح وشوف التفاصيل المعمارية، واقرأ عن حياة وإنجازات صلاح الدين اللي بتنعرض بالمكان.

وهيك بتكون عندك خطة يوم كامل مليان نشاطات ممتعة بالشام القديمة!