سوق الجزماتية: مطبخ دمشق العريق

سوق الجزماتية واحد من أشهر أسواق حي الميدان الدمشقي، وبيمثل جزء لا يتجزأ من عراقة هالحي وتاريخه. السوق موجود بحي الميدان الوسطاني، وبيعتبر نموذج حقيقي لحياة أهل دمشق القديمة. اسمو جاية من كلمة “الجزماتية” نسبة للجزمات، اللي هي نوع من انواع الأحذية اللي كانت تتصنع وتنباع بالسوق للشوام قديما وكان في نوع منها بيستخدمها الفرسان والجنود بهداك الوقت.

تاريخ سوق الجزماتية

السوق بيرجع لعصر المماليك وضل محتفظ بطابعه التراثي بتصنيع الجزمات لسنوات طويلة، رغم إنو تغير مع مرور الزمن وصار اليوم أكبر مركز لبيع الحلويات الشامية والمأكولات الشهيرة اللي بتعكس روح المطبخ الدمشقي.

أجواء السوق

سوق الجزماتية دايماً مليان حياة وحركة، وخاصةً خلال المناسبات الاجتماعية متل شهر رمضان وأيام العيد. الزوار بيجوا من كل أنحاء دمشق ليشتروا الحلويات والمأكولات اللي بتشتهر فيها المحلات بالسوق. التجار وأصحاب المحلات عندهم خبرة طويلة بطريقة عرض بضاعتهم، وبيبدعوا بتزيين محلاتهم بطرق بتشد الانتباه وبتخلي الزبون يعيش تجربة فريدة.

روح دمشق في سوق الجزماتية

السوق مو بس مكان للتسوق، هو جزء من ذاكرة دمشق وروحها. شوارع السوق بتنبض بالحياة، والزوار بيمشوا بين المحلات وهنن عم يتدوقوا الحلويات وبيستمتعوا بالأجواء التقليدية اللي بتاخدهم لزمن الأجداد. المحلات جنب بعضها، وأصحابها دايماً جاهزين لاستقبال الزوار بكرم وضيافة شامية معروفة,عراقة سوق الجزماتية وسمعته وصلت للدول الأجنبية بالقارات الخمس، فانتقلت الحلويات السورية المعروفة والمشهورة إلى الأسواق العربية والعالمية خاصة تركيا وألمانيا ومصر.

سوق الجزماتية بيضل رمز لعراقة دمشق وحلاوتها، وزيارتو بتخلي الواحد يشعر إنو عاش لحظة من لحظات الماضي الجميل. إذا كنت بدمشق، ما تفوت زيارة هالسوق اللي هو فعلاً قلب حي الميدان النابض.