ذكريات الزواج الشامي التقليدي

يا جماعة، خلونا نحكي عن العرس الشامي التقليدي وكيف كانت العادات والتقاليد الحلوة يلي بتجمعنا.

زيارة التعارف:

الخطبة بالشام بتبدا بالحكي بين النسوان على التلفون. إذا صار في قبول، الأم بتجي مع بنتها أو قرايبتها. بعدين العريس بيجي يشوف العروس بحضور والدها أو أخوها إذا الأمور مشيت تمام، بيتفقوا على “فصل النقد” ومبلغ “ملبوس البدن”.

الخطوبة:

بعد ما يتفقوا، العريس والعروس بيروحوا يشتروا المحابس مع الأمهات. فترة الخطوبة مليانة عزايم وطلعات وهدايا . حفلة الخطوبة بتكون بسيطة، غالباً ببيت العروس أو الصالة، وفيها غناء ورقص وزلاغيط شامية.

متل : أووووووها ياصحن تين

أووووها مجلل بالياسمين

أووووووها عروستنا حلوة

أووووووها ماطبقت العشرين

لوووووووووووووووووووليش

مد الجهاز:

قبل أسبوع من العرس، أهل العروس وأهل العريس بيعملوا “مد الجهاز”، بيوزعوا الأثاث والأغراض بالبيت الجديد، وبيساعدوا العروس بتجهيزاته.

يوم العرس:

العريس بيبدا يومه بحمام العرس بحمام السوق، بيحلق وبيجهز حاله، والأصدقاء والعيلة حواليه بيساعدوه. المسا بيبدا العرس، و بيعملوا مولد ديني وبيوزعوا صرر الملبّس والبوظة للرجال .

العروس بتتجهز من الصبح، بتروح على صالون التجميل للمكياج والشعر، وبترجع لبيت أهلها لتلبس الفستان الأبيض وتجهز حالها.

العريس بيجي بموعد محدد مع السيارة المزينة وفرقة العراضة. العروس بتستقبل بالزلاغيط والأغاني، وبتقعد على”الاسكي”. الأعراس بتكون إما بدي جي وأغاني أو أعراس دينية مع فرقة إنشاد.

العريس بيكون بعرس الرجال وبعد ثلاث ساعات بيجي على عرس النسوان وبيتم استقباله بالعراضة الشامية. متل:

شنكليلة شنكليلة… الله يعينه على هالليلة

عريس الزين يتهنّـى يطلب علينا ويتمنى

واهم شي اول مايوصل العريس على عرس النسوان ابو العريس بيفوت مع العريس وبيطرق راس العروس براس العريس كتعبير عن محبته وتمنياته الهم الله يوفق بيناتهم 

العريس بيرفع الطرحة وبيبوس العروس، وبيتوجهوا لل”اسكي”، وبيبدلوا الخواتم وبيقطعوا الكيك. الأعراس عادةً بتنتهي حوالي الساعة 12 أو 1، وبعضها بتستمر للصبح.

بعرس النسوان، بيوزعوا بوظة عربية (ايمع) بالصيف و محلاية بالشتوية مع عصائر وحلويات. بعد العرس، العرسان بيروحوا على البيت أو الأوتيل مع موكب السيارات المزينة يلي بتفتلهم الشام كلا وبتعبي الدنية بصوت الزمامير يلي بيخلي الناس بالطرقات تعرف انو موكب عرسان و تفرح لفرحهن . تاني يوم، بتصير “الصباحية” وبتجي الأمهات للزيارة والتهنئة. بعد خمس ايام، بيعملوا “مباركة” للعروس مع حفلة صغيرة بالبيت.

.

العرس الشامي هو مزيج من التراث والأصالة والفرح، وبيضل ذكرى حلوة بكل تفاصيله الجميلة.