حي الميدان الدمشقي: قلب دمشق النابض بالتاريخ والعراقة

حي الميدان هو واحد من أقدم وأعرق أحياء دمشق، بيحمل بين حاراته حكايات وقصص توارثتها الأجيال عبر الزمن. هالحي اللي بيقع بجنوب دمشق، على الطريق اللي بيوصل بين باب مصلى ومنطقة القدم، كان دائماً مركز للحركة والحياة بدمشق.

تاريخ حي الميدان

حي الميدان تأسس بعهد المماليك، وكان بمثابة محطة للقوافل والزوار المتجهين لمكة المكرمة والمدينة المنورة. سُمي بالميدان لأنو كان ميدان للتدريب على ركوب الخيل والفروسية. الحي ازدهر بسبب موقعه الاستراتيجي اللي بيربط دمشق بباقي المدن، وصار نقطة تجمع لأسواق كتيرة.تم تقسيم حي الميدان حسب التسميات الشائعة لعدة مناطق «ميدان فوقاني» و«ميدان تحتاني» و«ميدان أبو حبل». هالتقسيمات مشهورة بين سكان الحي وبتميّز كل منطقة بطابعها الخاص.

بيضم حي الميدان مباني تاريخية بتشهد على عراقة الشام. من هالمباني كنيسة القديس حنانيا، يلي تعتبر من أقدم الكنائس بدمشق بعد الكاتدرائية المريمية بشارع المستقيم. الكنيسة موجودة بزقاق القرشي بالميدان وبتتميّز ببنائها التراثي الجميل.

بالإضافة للكنائس، بيضم حي الميدان عدد كبير من المساجد التاريخية يلي بترجع لمختلف العهود. من أهم هالمساجد مسجد باب مصلى بـ«الميدان التحتاني» يلي تم تشييده بالعهد الأيوبي عام 1209. وكمان في مسجد الكريمي بـ«الميدان الفوقاني»، يلي بني بفترة العهد المملوكي عام 1318، ومسجد وضريح التينبية اللي اتأسسوا عام 1396 بنفس الفترة. مسجد منجك يلي تم بناؤه عام 1407 بيتميّز بطرازه المعماري المملوكي الجميل. ومن العهد العثماني، بيبرز مسجد وضريح الغواص يلي انبنى عام 1878 بمنطقة بتحمل نفس الاسم.

كمان، في عدد من الحمامات العربية الأثرية بحي الميدان، واللي بعضها لسا بيشتغل كحمام سوق. كل هالمعالم بتضيف لمسة تاريخية وروحية لحي الميدان، وبتعكس تنوع العصور يلي مرّت على الحي وقدرت تخلي هالمعالم شامخة عبر الزمن.

الحياة في حي الميدان

الميدان اليوم بيجمع بين التراث العريق والحياة العصرية. شوارعه مليانة بالأسواق والمحلات التجارية اللي بتبيع كل شي  بيخطر على بالك من الملابس والأقمشة وحتى الأطعمة التقليدية والحلويات الدمشقية. الحي معروف بروحه الدمشقية الأصيلة، وبيعيش أهله وزواره أجواء شامية دافية، سواء كان بزيارة الأسواق أو بتمشاية بشوارعه القديمة.

طابع الحي المعماري

بيتميز الميدان بمعماره التقليدي اللي بيجسد أصالة دمشق، ببيوته القديمة وأزقته الضيقة، وبتشوف لسا  بالحي مظاهر من التراث الدمشقي بالحارات والبيوت اللي بتجمع بين البساطة والجمال.

حي الميدان بيضل جزء لا يتجزأ من هوية دمشق، وبيمثل جزء مهم من تاريخ المدينة العريق. زيارته هي رحلة عبر الزمن، بتاخدك لتعيش أيام الماضي بعبقها وحلاوتها، وبتخليك تحس بجوهر دمشق الحقيقية.