حمامات دمشق القديمة: تجربة استرخاء مميزة

يا جماعة، إذا بدكم تعيشوا تجربة استرخاء حقيقية وتتعرفوا على جزء من التراث الدمشقي، لازم تزوروا حمامات السوق بدمشق القديمة. هالحمامات مو بس أماكن للنظافة، هي كمان مواقع اجتماعية وثقافية بتعكس الحياة الدمشقية الأصيلة.

تاريخ الحمامات

الحمامات الدمشقية إلها تاريخ طويل بيرجع للعهد الروماني، واستمرت لتزدهر بالعهد الأموي والعباسي. الحمام كان جزء أساسي من حياة الناس اليومية، وكانوا بيروحولو مو بس للاغتسال، بل كمان للتواصل الاجتماعي والمتعة.

أشهر الحمامات بدمشق

حمام نور الدين الشهيد:

موجود بسوق البزورية، وبيتميز بتصميمه وزخارفه الجميلة.

حمام البكري:

بحي باب توما، بيوفر تجربة استرخاء كاملة مع البخار والتدليك.

حمام الورد:

بسوق ساروجة، مشهور بنظافته وخدماته الممتازة.

أقسام الحمام

الحمام الدمشقي مقسوم لعدة أقسام:

البراني:

مكان الاستقبال وتغيير الملابس.

الوسطاني:

غرفة معتدلة الحرارة للراحة بعد الاغتسال.

الجواني:

القسم الأكثر حرارة، فيه غرف البخار والتدليك، مقسوم لمقصورات كل وحدة فيها “جرن” للاغتسال.

الموظفين في الحمام

الحمام الدمشقي بيشتغل فيه عدة موظفين مهمين:

المعلّم: مالك الحمّام أو مستثمره.

الناطور: هو المسؤول عن استقبال وخدمة الزبائن.

المصطبجي: بيكون مسؤول عن تسليم التعتبية وهي مجموعة المناشف والصابون.

القميمي: مسؤول عن تسخين المياه وتنظيم الحرارة.

الريس (المُكيّس): مسؤول عن تلييف وتفريك الزبون بالصابون والماء.

تجربة الاسترخاء

الزوار بيبدأوا رحلتهم بالحمام بالبراني، بيستلموا المناشف والصابون من المصطبجي، وبعدين بينتقلوا للوسطاني، وأخيراً للجواني للاغتسال والبخار والتدليك. بعد الجلسة بالحمام، بيرجعوا للوسطاني للراحة وتناول الطعام والشراب، وأخيراً بيرجعوا للبراني ليرتاحوا قبل مغادرة الحمام.

ايمتا كانوا يزوروا الحمام قديماً؟

كانوا يزوروا الحمام بالمناسبات الخاصة مثل قبل العرس، الأعياد، أو حتى للاسترخاء بنهاية الأسبوع. الحمام كان يعتبر مكان للاحتفال والراحة. بالإضافة لهيك، جدودنا كانوا يزوروا حمام السوق بشكل دوري كل أسبوع للاغتسال والراحة، وكانت زيارة الحمام تُعتبر نزهة حقيقية مليانة بالاكلات الطيبة والشراب وزوادة من الحكايات والأغاني.

ليش لازم تزوروا الحمامات الدمشقية؟

من المحزن إنه صرنا نتذكر هالحمامات بس كجزء من الماضي أو بمشهد من مسلسل شامي. زيارة الحمامات الدمشقية هي فرصة لتعيشوا تجربة استرخاء مميزة وتتعرفوا على جزء كبير وحلو من التراث الدمشقي، وكمان فرصة لتلاقوا مي سخنة بهالظروف يلي ما بتيجي فيها الكهربا. زوروا حمامات دمشق القديمة واستمتعوا بالراحة والاسترخاء، وخلوا هالتجربة تضيف لمسة من الفرح والذكريات الجميلة لحياتكم.