مدونة
السيران الشامي على أصوله
السيران هو واحد من أقدم التقاليد الاجتماعية بالشام وبينقال انو هو عادة من الأيام الرومانية، وهو عبارة عن رحلة عائلية أو تجمع للأصدقاء في الطبيعة بعيد عن صخب المدينة. السيران الشامي بيجمع بين المتعة، الأكل اللذيذ، والأحاديث الحلوة، وبيعتبر من أهم العادات اللي بتجمع الناس ببعضها.
تحضيرات السيران: تحضيرات السيران تبدأ قبل أيام من اليوم المنتظر. الأمهات بيبلشوا بتحضير الأكل اللي رح ياخدوه معهم، وبيكون فيه تركيز على الأكلات اللي بتناسب الأكل برا، أهم الأكلات اللي بتنحضر للسيران هي المشاوي، والكبة، والتبولة وأكيد الشاي أو المتة، لأنهم جزء ما بيتجزأ من السيران.
اختيار المكان: الشوام عندهم أماكن مفضلة للسيران أهم ميزتين بمكان السيران أنو يكون فيه طبيعة حلوة وقريب. من أشهر الأماكن اللي بينعمل فيها السيران بدمشق والمناطق المحيطة:
- الربوة: المنطقة الأقرب لدمشق، بيمر فيها نهر بردى وفي طبيعة حلوة وشجر
- عين الفيجة: شو بدنا أحلى من سيران جنب نبع المي الباردة يلي بيسقي الشام كلها
- والغوطة الغربية منطقة رائعة مليانة خضار ومي وفي ومكان مثالي للهرب من حرارة الصيف.
- الغوطة الشرقية: قبل الحرب، كانت من أهم مناطق السيران، وتتميز بالبساتين الخضراء والجو الريفي الهادئ.
أجواء السيران: يوم السيران ببلش بكير العيلة أو الأصدقاء بيوصلوا عالمكان وبينقوا الموقع المثالي تحت شي شجرة، وبيبلشوا بتحضير المكان، بيفرشوا السجاد والبساط، بيجهزوا الفحم للمشاوي، وبيحضروا الطاولات. السيران بكون مليان بالضحك والحكايا، الناس بتلعب ألعاب شعبية، مثل الطاولة والشدة، والأطفال بيلعبوا مع بعض أو بيسبحوا إذا كان المكان قريب من نهر.
الأكل بالسيران: الأكل هو جزء أساسي من تجربة السيران. المشاوي بتكون على رأس القائمة، والشوي بحد ذاته بيكون نشاط جماعي. الكل بيشارك بتحضير الأكل، وكل حدا عنده مهمة معينة. بعد الأكل، بيجي وقت التحلاية، وبيكون في عنا خيارات مثل البطيخ، والتين، والعنب، حسب الموسم. وبعد الأكل، بيجي وقت شرب الشاي أو المتة، وهو جزء ما بينفصل عن أجواء السيران.
نهاية اليوم: مع غروب الشمس، بتجمع الناس غراضها وبتتحضر للرجعة.
بالمختصر، السيران الشامي هو تجربة بتجمع بين الطبيعة، الأكل، والعلاقات الاجتماعية. هو وقت للراحة والاستمتاع بجمال الطبيعة بعيد عن ضغوط الحياة اليومية، وجزء من عادات وشخصية الشوام اللي بتعكس حب الحياة والبساطة.