بالشامي
أمثال ما بتسمعها إلا بالشام
بيقولوا أهل أول ما تركوا شي ما متّلو عليه من النصايح والحكم، للوصف والمدح والذم كل موضوع وكل موقف الو متل وبيعبر عنه، هون جمعنالكم أشهر الامتال الشامية ومعانيها
“القرد بعين أمو غزال”
للتعبير عن حب الأم لأبنائها مهما كانوا.
“اللي بدق الباب بيسمع الجواب”
للتأكيد على إنو كل فعل إلو رد فعل وكل حدا بيتحمل نتائج أفعالو.
“كل ديك ع مزبلتو صياح”
للتعبير عن إنو كل واحد بيكون قوي بمجاله ومكانه.
“من برا رخام ومن جوا سخام”
للتعبير عن الشخص أو الشيء اللي بيبين من برا بشكل حلو لكن من جوا مو كل هالقد
“يلي بياكل العصي مو متل يلي بيعدها”
للتعبير عن الفرق بين الشخص يلي بيتحمل الصعاب والشخص يلي بيتفرج.
“الحكي ما عليه جمرك”
للتعبير عن سهولة الكلام بدون تكاليف أو مسؤوليات، وإنو الأفعال هي الأهم.
“إذا كبر ابنك خاوِيه”
للتشجيع على معاملة الأولاد الكبار كأصدقاء ومشاركتهم بالحياة.
“العين بصيرة والإيد قصيرة”
للتعبير عن العجز بتحقيق الرغبات بسبب قلة الموارد أو الإمكانيات.
“يلي بيتو من قزاز ما يرمي الناس بحجر”
للتنبيه على عدم انتقاد الآخرين لما يكون الشخص نفسه معرض للنقد.
“دود الخل منو وفيه”
للتعبير عن إنو المشكلة أو الفساد نابع من جوّا.
“يلّي بأدّب ولاده بيقهر حسّاده”
نصيحة للاهل ليحسنوا تربية أولادهن
وفي بعض الأمتال الشعبية والمضحكة يلي بتستخدم من العوام ويلي غالباً بيكون هدفها النقد:
- لا تخافوا إذا غلي الخبز اشتروا طحين و كلكم بتعرفوا تلتوا و تعجنوا
- الحكي بالوجه قوة و الحكي بالقفا قلّة مروّة
- جوّزوا مشكاح لنعيمة طلعوا التنين ماعليهم قيمة
- صار للدبانة دكانة وصارت تسكر على بكير
- الخنفسة شافت بنتا على الحيط قالتلها تؤبريني متل اللولية بالخيط