أكلات ما بيعرفها إلا السوريين

المطبخ السوري غني بأصناف كتيرة وكل منطقة عندا طريقتها بتحضير هالأكلات وبالشام عنا اكلاتنا المميزة بمكوناتها وأساميها هي شوية أكلات من مطبخنا رح تشتهيها أكيد

الباشا وعساكره:

أكلة الباشا وعساكره، أكلة قديمة بترجع لأيام العثمانيين. سموها بهالاسم لأنها طبخة مكلفة وفاخرة وكانت تتقدم للباشاوات. هي عبارة عن لبن مطبوخ بقلبه كبة (الباشا) وشيش برك (عساكره).

الحرّاق إصبعو:

“حرّاق إصبعو” أو “حرق إصبعو” أو “محروقة إصبع”، أكلة شعبية ببلاد الشام، مشهورة بمدينة دمشق، وبكل أنحاء سوريا. لتحضيرها، بتجتمع نساء الحارات الدمشقية سوا، بيتقاسموا مراحل طهيها الطويلة والمتعبة. بتحضر باستخدام العدس، العجين أو المعكرونة، البصل، دبس الرمان، زيت الزيتون، بهار أسود، ملح، وبعض الأحيان بيضيفوا الكوسا. للزينة بيحطوا على الوجه كزبرة مقلاية بزيت الزيتون مع الثوم، قطع خبز مقلي، بصل مقلي، وحبات الرمان. تعتبر نوع من المقبلات مش أكلة رئيسية.

الكواج:

هاي الأكلة يلي كل الأمهات بيعملوها لما بدهن يفضوا البراد. فليفلة، بصل، بندورة، بيتنجان، كوسا، وبطاطا مع لحمة ومقابيلها رز.

ستي زبقي:

العدس واللحمة هنن المكونات الرئيسية بطبق ست زبقي. هالطبق غني بالقيم الغذائية لأن العدس من أهم مكوناته.

طباخ روحو:

طباخ روحه هو أكله كوسا وبيتنجان وبندورة ولحمة توم، وتوابل. بيتقدم مع الرز أو الخبز. وسبب التسمية كتير غريب بيتلخص بقصة شعبية بتقول انو كان في ملك وملكة اجاهن بنت بعد سنين وسموها “روحو” وكانت هالبنت ما تاكل شي لحد ما اقنعها طباخ شعبي تاكل هالأكلة البسيطة وحبتها فسموها أكلة طبّاخ روحو.

سجقات:

ما منخلي شي من الخاروف ما مناكله هاد أول تعليق لأي حدا بيسمع بأكله السجقات، السجقات هي أكلة معتبرة، عبارة عن أمعاء الخاروف محشية باللحمة المفرومة والرز. تعتبر من أصعب الأكلات لأنو تنظيف السجقات والتخلص من الزفرة بده نهار لحاله بتنعمل بالمناسبات وبينعزم عليها وخاصة بعيد الأضحى.

باسماشكات:

عبارة عن شرائح لحمة محشية بالرز واللحمة والمكسرات بتتخيط وبتسلق، تحضيرها بده وقت طويل وشطارة بالحشي والخياطة حتى ما يطلع الرز برا اللحمة.

يلنجي:

لاسم من اللغة التركية ومعناه ورق عنب كذاب لأنو ما فيه لحمة. وهو عبارة عن ورق عنب محشي رز وخضار ومطبوخ مع دبس الرمان والليمون الحامض وبتشتهر التتبيلة الشامية لليلنجي بمعلقة بن بتعطيها طعمة غير شكل، وبالغالب بينعمل جنب يالنجي ورق العنب يالنجي كوسا وبيتنجان، مع انو بياخد كتير شغل إلا أنو بيتقدم كمقبلات ومانو طبق رئيسي.

جظ مظ:

الجظ مظ تعتبر وجبة مساندة وممكن تكون وجبة رئيسية. بتتاكل مع الخبز جنبها بصل حسب الرغبة. الاسم أصله تركي، بالذات من لواء إسكندرون، وتعرّب وصار يتسمى هيك بالساحل السوري وبكل مناطق سوريا تقريباً.

بالوظة:

البالوظة هي نوع من الحلويات الباردة مصنوعة من الحليب، النشا، والسكر، ومنكهة بماء الزهر، وفوقها طبقة من البرتقال مع نشا. تقدم باردة ومزينة بالمكسرات. بيتقدم بالموالد والمناسبات متل راس السنة الهجرية والمولد النبوي.

زلابية:

الزلابية عجينة بتتقلى وبعدين بتتغطى بالقطر أو السكر مشهورة أكتر شي بمنطقة باب توما وبتتقدم بعيد الغطاس

برازق:

البرازق هو عجينة من السميد وعليها سمسم وفستق حلبي. كانت من زمان القرص كبير وهلأ صاروا يصغروها لتتضيف بالأعياد مع فنجان القهوة.

كشك الأمراء:

كشك الأمراء، أو كشك الفقرا، هو المهلبية الشامية، مصنوعة من حليب، نشا، وماء زهر، بيتركوا ليبردوا وبيتزينوا بالفستق الحلبي كمان بتتضيف بالموالد والمناسبات وخاصة الأعراس زمان

كول وشكور:

كول وشكورهي عجينة محشوة بالمكسرات متل الجوز أو الفستق، بتتقلى وبتتغطى بالقطر من حلويات العيد ورمضان.

تماري كعك:

التماري أو الكريب السوري هي اكلة شعبية منلاقيه عالعربايات بالشوارع، عبارة عن طبقتين عجين بينحط بقلبه دبس تمر وطحينة وسمسم وأحياناً موزة وسكر ناعم، سعرها مناسب وأغلبنا بياكلها يا بالشعلان يا بالحريقة.

العرقسوس:

العرقسوس هو مشروب تقليدي مصنوع من جذور نبات العرقسوس. بيتقدم بارد ومنعش، خاصة بفصل الصيف مع أنو أغلب العالم ما بتحبه بس دايماً بتلاقيه موجود عالسفرة برمضان.